Información xeneral

L´edificiu pequeñu que sirve na actualidá como almacén del santuariu de Santa María d´Arbazal ye un exemplu enagora únicu n´Asturies de templu aldeanu, al serviciu d´una comunidá llabradora altomedieval. Atópase na aldega del so nome, asitiada na fastera occidental del monte Arbazal. Escarez d´elementos directos que permitan la so fechación, polo qu´hai que recurrir a la comparanza con otros edificios altomedievales similares p´asitiala nel so contestu históricu, ente los sieglos VIII y X.

Trátase d´una capiya de nave y cabecera úniques, orientada perfectamente al este. L´edificiu asitia sobre roca. L´apareyu observable ye de caxes y mampuestos irregulares de piedra caliar gris, bien trabaos, ensin sillares nos esquinales. Nel llau norte, esterior, cuerre un rebancu a lo llargo del muriu, bien arruináu, formáu por mampuestos y llábanes. L´interior organízase en nave rectangular y cabecera trapecial.

Por dimensiones y factura, Santa María d´Arbazal ye un testigu -escepcionalmente calteníu- de lo que tuvo de ser la rede d´oratorios y templos rurales altomedievales, sumíos so les socesives reconstrucciones de dómines posteriores. Caltuviéronse exemplos similares na so concepción espacial nos condaos catalanes, sobremanera nel Ampurdán (Sant Julià de Boada), y nel Hérault francés, fechaos nos sieglos IX y X. Nel ambiente históricu del Reinu d´Asturies destaquen los paralelos de la capiya de San Salvador (monesteriu de San Julián de Samos, Lugo), con idéntica solución pal arcu triunfal, y San Román de Moroso o Santa María de Helguera (Cantabria), fechaos na primer metá del sieglu X, y adscribibles pola so escultura arquitectónica a la denominada arquitectura mozárabe lleonesa. Toos estos casos son fechables con anterioridá a la llegada del Románicu (escontra 1.070-1.100 n´Asturies). La morfoloxía del arcu triunfal, de frontales adelantaos, ye desconocida tanto na arquitectura prerrománica asturiana como na románica, postulando un primitivismu probablemente altomedieval, pos tal solución nun s´alcuentra na arquitectura de dómina hispanovisigótica, si ye que d´ésta puede falase entá na Península Ibérica.

Datos d´interés

Accesos
N´Arbazal, Villaviciosa.