Información xeneral

Nun llugar denomináu Ligno llevantó Ramiro I (842-850) un templu que dende´l sieglu XII siquier lleva la advocación de San Miguel. Atópase a unos 300 metros al Noroeste de Santa María de Naranco. Les diverxencies de proyectu y d´execución ente los dos son lo bastante grandes como pa deducir que nun correspuenden a l´actuación del mesmu maestru nin taller.

La hestoria d´esti templu ye accidentada. A fines del sieglu XI sufriera un derrumbe qu´afectó a los dos tercios de la so fábrica orixinal. Namá quedó en pie’l sector occidental. En baltando les ruines, la estructura restante consolidóse y completóse con una tosca capiya oriental, construyida nel mesmu sieglu XI o nos primeros años del XII.

La planta orixinal yera un rectángulu d´unos 20x10 m, nel que s´ensertaben una cabecera triple, con tres capiyes rectangulares embutíes nun únicu muriu testeru, un posible transeptu inscritu en planta, tres naves estremaes por arqueríes de lladriyu sobre columnes y un antecuerpu occidental complexu. Nun tuvo cámares llaterales al Norte y al Sur de les naves. Toles dependencies del edificiu tán abovedaes con cañón.

La decoración escultórica ye especialmente importante. Formen parte d´ella tanto pieces reaprovechaes como llabraes a costa fecha, lo que resta unidá estilística al edificiu. Nel esterior, lo más destacable ye la serie de celosíes calaes, de les que caltenemos dos orixinales na fachada Oeste y na fachada Sur. Nel interior destaquen les grandes columnes de les arqueríes divisories de les naves, sofitaes sobre bases historiaes y coronaes por capiteles imposta troncopiramidales. Les bases, de les que se caltuvieron una ventena, constitúin unu de los conxuntos escultóricos más orixinales de tola Alta Edá Media. Trátase de bloques prismáticos, dividíos en sectores cuadrangulares per llínies sogueaes, nel interior de los que s’asítien los Símbolos de los Evanxelistes (Tetramorfos).

Esti conxuntu escultóricu atestigua la diversidá de manos que trabayaron nel templu del Naranco. La obra más destacada de la escultura de Lliño atópase nos frontales del pórticu. Trátase de dos pieces monolítiques coronaes por una imposta de billetes. Nos sos frentes, estremaos en tres campos, llabráronse motivos rellacionaos colos xuegos circenses romanos. Nel campu cimero, representación del cónsul ente dos funcionarios. Nel campu central esculpiéronse escenes circenses, con una adomadura de lleón, irguíu en dos pates ante´l domador, forníu con cayáu y llátigu, y un funambulista, n´exerciciu d´equilibriu sobre una piértiga, apreciándose en segundu planu la xaula o caxa de la que salió l´animal.

L´interior del templu caltién importantes restos del revestimientu pictóricu orixinal. Nes bóvedes de les naves contémplense motivos de casetones asemeyaos a los de les capiyes de la cabecera de Santuyano, formaos por octógonos y hexágonos enllazaos, con flores y estrelles nel interior.

Datos d´interés

Accesos
Uviéu. Costera del Monte Naranco.
(a 3 Km. d’Uviéu).

Bus llínia A1 y A2. Información horarios y paraes: www.tua.es

Visites
Contactu:
Tfnu: 985 21 26 60 (parroquia) 

638 26 01 63 (guardesa).

Horariu:

Del 1 de xineru al 31 de marzu y del 1 de ochobre al 31 d′avientu:
De martes a sábadu, de 10:00 a 14:30 h. (últimu pase).

Domingos y 31 d′avientu, de 10:00 a 12:30 h. (últimu pase).

Cerráu, 1 y 6 de xineru, del 14 de xineru al 21 de mayu, 11 d´ochobre, 1 y 15 de payares y 6, 24 y 25 31 d′avientu.

En Navidá preguntar horariu.

Del 1 d´abril al 30 de setiembre:
De martes a sábadu, de 09:30 a 13:00 y de 15:30 a 19:00 h. (últimu pase).

Domingo, de 09:30 a 13:00 h. (últimu pase).

Llunes: accesu gratuitu de 09:30 a 13:00 hores (ensin guía).

Cerráu, 31 de xunetu, 8 y 21 setiembre y del 4 d′ochobre hasta nuevu avisu.

Observaciones
Tarifes
Xeneral: 4 €.

De 8 a 14 años: 3 €.

Grupos: 3 €.

Grupos de neños/es: 2 €.

Llunes: accesu gratuitu de 09:30 a 13:00 hores (ensin guía).

Otros descuentos, consultar.

Les entraes pa visitar St.ª María de Naranco y San Miguel de Lliño cómprense en St.ª M.ª de Naranco.

Los llunes de inviernu Santa María abre a les hores en punto y San Miguel de Lillo a les hores y media y los llunes de branu Santa María abre a les hores y media y San Miguel de Lillo a les hores en punto.

Más información: www.santamariadelnaranco.es.